22.12.2011
"ქრისტიან-დემოკრატების" ლიდერის, გიორგი თარგამაძის აზრით, ბიძინა ივანიშვილის ბანაკში წინააღმდეგობებია. "დიდი ინტერესით ვადევნებ თვალს ჩამოყალიბების ეტაპზე მყოფ ახალ ბლოკს, თუმცა მინდა გითხრათ, რომ ძალიან ბევრი პასუხგაუცემელი კითხვა დამიგროვდა. როგორც პოლიტიკოსს, მქონდა მოლოდინი, მათი მიდგომები გაცილებით პრაგმატული იქნებოდა, რომ პოლიტიკური რომანტიზმის ხანა დასრულდებოდა და ადამიანები გადაწყვეტილებას რაციონალური ინტერესებიდან გამომდინარე მიიღებდნენ, მაგრამ მათი მოქმედებები ეჭვებს მიჩენს", - განაცხადა თარგამაძემ დღეს ჟურნალისტებთან შეხვედრისას.
მისივე განმარტებით, ეჭვებს პარლამენტის დეპუტატების რაოდენობის გაზრდის მიუღებლობასთან დაკავშირებით ივანიშვილის მომავალი პარტნიორების, "რესპუბლიკელებისა" და ირაკლი ალასანიას გუნდის წევრების პოზიცია უჩენს, რადგან აღნიშნულ საკითხთან დაკავშირებით საუბრები "რვიანის" ფორმატშიც მიმდინარეობდა და მაშინ კონკრეტული გადაწყვეტილებებიც კი იყო მიღებული.
"ის დამოკიდებულება, რაც დეპუტატების რაოდენობის გაზრდასთან დაკავშირებით ივანიშვილის მოკავშირეებმა აირჩიეს, მიჩენს ძალიან ბევრ ეჭვს და არა მხოლოდ ეჭვს, არამედ ვხედავ, როგორ ხდება ივანიშვილის ოცნების ტრანსფორმირება "რესპუბლიკელებისა" და ალასანიას პარტიის ოცნების ასრულებად, რომ რამენაირად მოხვდნენ საქართველოს პარლამენტში. დეპუტატთა რაოდენობის გაზრდაზე "რვიანის" ფორმატში არა მხოლოდ საუბრები იყო, არამედ შეთანხმებებიც. 2011 წლის მაისში "ნაციონალური ოძრაობისთვის" შეთავაზებული წინადადებათა პაკეტი სწორედ "გერმანული მოდელის" შექმნას ითვალისწინებდა, რაც, თავის მხრივ, დეპუტატთა რაოდენობის გაზრდას გულისხმობდა. როგორც ჩანს, ან ვერ აანალიზებენ რა შედეგებს მოიტანს ეს გადაწყვეტილება, ან თავად ივანიშვილის ბანაკშია სერიოზული წინააღმდეგობები", - აღნიშნა თარგამაძემ.
ამასთან, მან დეპუტატ გია თორთლაძის მიერ გაკეთებულ განცხადებასთან დაკავშირებითაც გააკეთა კომენტარი, რომლის მიხედვითაც, ივანიშვილი კრემლის ინტერესებს ატარებს, ამ მიზნით კი სხვა პარტიებსაც აფინანსებს. თარგამაძის თქმით, თეორიულად გამორიცხული არაფერია.
"იმაზე, რომ რუსეთი ყოველთვის იყო და არის დაინტერესებული, საქართველოს პოლიტიკურ პროცესებზე გავლენა იქონიოს, განვლილი 20-წლიანი ისტორია კარგად მეტყველებს. ამიტომ თეორიულად გამორიცხული არაფერია, ჩვენ საკუთარი ქვეყნისა და ხალხის წინაშე ვიქნებით უპასუხისმგებლოები, თუ ამ ფაქტორს არ გავითვალისწინებთ", - აღნიშნა თარგამაძემ.
იხილეთ დედანი
