”პირველი”

"ქრისტიან-დემოკრატების" ერთ-ერთი ლიდერის ნიკა ლალიაშვილის მტკიცებით, "ხელისუფლების მიერ შემოთავაზებულ საარჩევნო ინიციატივებზე შეთანხმება მოცემული მომენტისათვის ისეთივე ერთადერთი სწორი გადაწყვეტილება იყო, როგორც 2008 წლის გაზაფხულზე - პარლამენტში შესვლა".

ამის თაობაზე ლალიაშვილმა ჟურნალისტებს ცსკ-ში განუცხადა, სადაც ის საარჩევნო შეთანხმების ხელმოსაწერად თანაპარტიელ გიორგი ახვლედიანთან ერთად მივიდა.


"ეს შეთანხმებები და მომზადებული დოკუმენტი საარჩევნო გარემოს მნიშვნელოვნად აუმჯობესებს. არშეთანხმების ალტერნატივა კი არის ორი: ან უნდა წავიდეთ რადიკალიზმის გზით, ან დავიწყოთ წყლის უნაყოფო ნაყვა, რაც "რვიანის" ფილოსოფიის მხოლოდ დეგრადაციას მოახდენს", - განაცხადა ლალიაშვილმა.

ამასთან, მისი აზრით, "ნაციონალურმა მოძრაობამ" ფაქტობრივად ოპოზიციის ყველა შეთავაზება გაიზიარა, ბიომეტრიის გარდა და ნაწილობრივ საარჩევნო სისტემა დათმო".

"მნიშვნელოვანია ისიც, რომ ამ შეთავაზების თანახმად, გაჩნდა ფული და ვინც ამაზე უარს ამბობს, პოლიტიკაში ელემენტარულად ვერ ერკვევა. დაფინანსების გამოჩენა განსაკუთრებით მნიშვნელოვანია იმ ფონზე, როდესაც მმართველი პარტია 15-ჯერ მეტ თანხას ხარჯავს წინასაარჩევნოდ, ვიდრე ყველა ოპოზიციური ჯგუფი, ერთად აღებული", - აღნიშნა ლალიაშვილმა.

დოკუმენტს ხელი "ნაციონალებმა", "ახალმა მემარჯვენეებმა", "ქრისტიან-დემოკრატებმა", მოძრაობამ "ჩვენ თვითონ" და "ეროვნულ-დემოკრატიულმა" პარტიამ უკვე მოაწერეს.

http://pirweli.com.ge/index.php?option=com_content&task=view&id=73427