”პირველი”

"ქართული აკადემია" ხელისუფლების ინიციატივას საარჩევნო ბარიერის გადალახვის შემთხვევაში შეთანხმების ხელმომწერი პარტიის მილიონი ლარით დაფინანსების შესახებ "მოსყიდვის აშკარა მცდელობად" აფასებს.

"ხელისუფლების მიერ საარჩევნო გარემოს გაუმჯობესებასთან დაკავშირებული და "რვიანისთვის" ულტიმატუმის ფორმით შეთავაზებული წინადადებები სხვა არაფერია, თუ არა "ნაციონალებისთვის" დამახასიათებელი თვალთმაქცობის, უპასუხისმგებლობის, ცინიზმის, მოსყიდვის, შანტაჟის ნაზავი. თავისი უკანონო, უზნეო და მიუღებელი წინადადებებით ხელისუფლებამ მოლაპარაკებათა მრავალთვიანი პროცესი ფაქტობრივად ჩაშალა.
დასანანია, რომ "რვიანის" ორმა სუბიექტმა - "ახალმა მემარჯვენეებმა" და "ქრისტიან-დემოკრატებმა" ბრძოლის სიმძიმეს ვერ გაუძლეს, სათანადო პასუხისმგებლობისა და სიმტკიცის გამოჩენა ვერ შეძლეს და მიიღეს ხელისუფლების მიერ შემოთავაზებული ფასადური, ზნეობისა და კანონისაგან შორს მდგომი წინადადებები, რომლებიც საქართველოში მეტ-ნაკლებად სამართლიანი არჩევნების ჩატარებას გამორიცხავს. მივიჩნევთ, რომ იმ პარტიების გადაწყვეტილება, რომლებმაც პრინციპები არ დათმეს და სამართლიანი საარჩევნო გარემოს მოსაპოვებლად პრინციპულ ბრძოლას ყველა კონსტიტუციური მეთოდით აგრძელებენ, სწორი გადაწყვეტილებაა და ფართომასშტაბიანი საზოგადოებრივი მხარდაჭერის შემთხვევაში წარმატების მაღალ ალბათობას შეიცავს", - აცხადებს "ქართული აკადემია" და ასეთ პარტიებს თანადგომას უცხადებს.

გარდა ამისა, "ქართული აკადემია" აუცილებლად მიიჩნევს, ხელისუფლების მიერ პროცესის ფაქტობრივი ჩაშლის შესახებ სრულფასოვანი და ობიექტური ინფორმაცია საქართველოში აკრედიტებულ დიპლომატიურ კორპუსს, საერთაშორისო სადამკვირვებლო ორგანიცაზიებსა და პარტნიორი ქვეყნების მთავრობებს სამართლებრივი ექსპერტიზისა და პოლიტიკური შეფასებისათვის ოპერატიულად მიეწოდოს.

http://pirweli.com.ge/index.php?option=com_content&task=view&id=73417&Itemid=1