საპარლამენტო უმრავლესობის წევრი პავლე კუბლაშვილი ამომრჩევლის უფლებებთან დაკავშირებით ოპოზიციური "ექვსიანის" შეთავაზებაში დიდ საფრთხეს ხედავს.
"ჩვენ არ გვსურს და არც ერთ პოლიტიკურ ძალას არ უნდა უნდოდეს, რომ რომელიმე ჩვენი თანამოქალაქე დარჩეს ხმის უფლების გარეშე. ამის დიდ საფრთხეს ქმნის ის მოდელი, რომელსაც ისინი გვთავაზობენ", - განუცხადა ჟურნალისტებს კუბლაშვილმა "ექვსიანის" შეთავაზების კომენტირებისას.
მისივე მტკიცებით, პროცესი, რომელსაც სთავაზობენ, არჩევნების დღეს ძალიან ბევრ გაუგებრობას გამოიწვევს. "თუ ჩვენ მიზნად გავიხდით იმას, რომ ვაიძულოთ ყველა ჩვენი მოქალაქე, გამოცვალოს თავისი პირადობის მოწმობა, შედეგად მივიღებთ იმას, რომ ბევრი ადამიანი, სხვადასხვა მიზეზის გამო, ვერ მოასწრებს ამ მოწმობების აღებას და არჩევნებზე ხმის მიცემის დროს პრობლემები შეიქმნება", - განმარტა კუბლაშვილმა.
ოპოზიციურმა "ექვსიანმა" დღეს ხელისუფლებას ამომრჩეველთა სიის ბიომეტრიული მონაცემებით რეგისტრაცია კიდევ ერთხელ შესთავაზა.
იხილეთ დედანი
