17.10.2011
ბიძინა ივანიშვილი პოლიტიკური პროცესებიდან გათიშვას არ აპირებს. როგორც ru.reuters.com იუწყება, ამის შესახებ ივანიშვილმა "როიტერთან" საუბარში მისთვის საქართველოს მოქალაქეობის ჩამორთმევის კომენტირებისას განუცხადა.
"მათ სცადეს, პოლიტიკური პროცესებიდან გამომთიშონ, მაგრამ მე გაჩერებას არ ვაპირებ. თუ ისინი შეეცდებიან, რომ არჩევნებში მონაწილეობა ამიკრძალონ, ეს არჩევნები არალეგიტიმური იქნება", - განაცხადა ივანიშვილმა.
ამასთან, "როიტერი" აღნიშნავს, რომ ივანიშვილმა საქართველოს მოქალაქეობა 2004 წელს, პრეზიდენტ სააკაშვილის პირადი განკარგულებით მიიღო.
ოპოზიციასთან მოლაპარაკებების კომენტირებისას კი, ბიძინა ივანიშვილმა განაცხადა, რომ საუბარი იმაზე, შეიქმნება ბლოკი, თუ იქნება ერთი პარტია, ნაადრევია.
"ამჟამად მიმდინარეობს მოლაპარაკებები ჯანსაღ ოპოზიციურ პოლიტიკურ ძალებთან. 90%-ანი დარწმუნებით შემიძლია გითხრათ, რომ პარლამენტში აბსოლუტური უმრავლესობით გავალთ", - განაცხადა ივანიშვილმა.
მან "როიტერთან" საუბარში ასევე აღნიშნა, რომ პოლიტიკაში მოსვლა "ერთკვირიანი ყოყმანისა და უძილო ღამის" შემდეგ გადაწყვიტა.
"მე ბოლო მომენტამდე ვყოყმანობდი, მაგრამ ახლა ვფიქრობ, რომ ჩემი პოზიციები დღითიდღე გამყარდება, ხოლო ხელისუფლების პოზიციები დასუსტდება", - განაცხადა ბიზნესმენმა.
მან დაადასტურა, რომ აპირებს, რუსეთში მისი აქტივები გაყიდოს და ფული ქართულ ეკონომიკაში ჩადოს.
"რუსეთში ჩემი ქონების შეფასების პროცესი უკვე დაწყებულია. მესმის, რომ მაქსიმალურ ფასად ვერ გავყიდი, მაგრამ მზად ვარ, ყველაფერი გავყიდო", - განაცხადა ივანიშვილმა.
