5.10.2011
"ახალი მემარჯვენეების" ერთ-ერთი ლიდერი, მამუკა კაციტაძე ბიძინა ივანიშვილის ბიზნესიდან პოლიტიკაში გადანაცვლების შეფასებას ოფიციალური განცხადების გაკეთებამდე არასერიოზულად თვლის. კაციტაძის თქმით, საქართველოს კონსტიტუცია პოლიტიკური პარტიის შექმნის უფლებას ყველა მოქალაქეს ანიჭებს, შესაბამისად, ივანიშვილსაც შეუძლია, შექმნას პარტია. "ამ ეტაპზე ჯერ-ჯერობით მხოლოდ ორი რამის თქმა შემიძლია: 1. ჯერ არ ვიცით ივანიშვილის ოფიციალური განცხადება და მისი დეტალები, შესაბამისად, კონკრეტულს ვერაფერს ვიტყვით და 2. ასეც რომ იყოს, პოლიტიკური პარტიის შექმნის უფლება საქართველოს კონსტიტუციით არის უზრუნველყოფილი. ასე რომ, მისი შექმნის უფლება აქვს ყველას. სხვა შეფასება ამ ეტაპზე უაზრობა იქნება", - აცხადებს მამუკა კაციტაძე.
ჩვენს კითხვაზე, ივანიშვილის პარტია ხომ არ დააზარალებს ოპოზიციურ სპექტრს, კაციტაძე პასუხობს: "არსებულ პოლიტიკურ სიტუაციაში გავლენების მოხდენა ყველა მიმართულებით შესაძლებელია, თუ პოლიტიკურ ორგანიზაციას ძლიერი ბირთვი ჰყავს. მე არ ვიცი, რა წონით და ინტერესებით შემოვა ივანიშვილი პოლიტიკაში და რა გავლენას იქონიებს ის ქართულ პოლიტიკაზე. ვირტუალურ თემებზე კი რაიმე ჩამოყალიბებული აზრის თქმა ნამდვილად გამიჭირდება. "
