11.12.2011
მუსიკოს ჯემალ ბაღაშვილის განცხადებით, "ქართულმა საზოგადოებამ პოლიტიკური ლიდერების არა პიროვნული ქარიზმის, არამედ პროგრამის მიხედვით არჩევა უნდა ისწავლოს".
ამის შესახებ ბაღაშვილმა დღეს საზოგადოებრივი მოძრაობა "ქართული ოცნების" პრეზენტაციის შემდეგ განაცხადა.
"ყველაზე კარგი ხელისუფლების პირობებშიც კი აუცილებელია, საპირწონედ მძლავრი, რეალური ოპოზიციური ძალა არსებობდეს, რასაც დღეს ვხედავთ. სხვანაირად არცერთი ხელისუფლება ქვეყნისთვის და ხალხისთვის თავის მაქსიმუმს არ ან ვერ გააკეთებს. შესაბამისად, ეს საპირწონე ძალა უკვე არის. დანარჩენი, ქართულმა საზოგადოებამ პოლიტიკური ლიდერების არჩევა უნდა ვისწავლოთ და არჩევანი არა მათი პიროვნული ქარიზმის, არამედ პროგრამების მიხედვით გავაკეთოთ. თანაც ძალიან მნიშვნელოვანია, არჩევნების მნიშვნელობის გვჯეროდეს. პოლიტიკური შეჯიბრი სწორედ სამართლიანი არჩევნების პირობებში უნდა ჩატარდეს", - განაცხადა ბაღაშვილმა.
შეგახსენებთ, რომ საზოგადოებრივი მოძრაობა "ქართული ოცნება" დღეს დაფუძნდა. მას ბიძინა ივანიშვილი უხელმძღვანელებს.
