16.12.2011
"ეროვნულ-დემოკრატიული პარტიის" ლიდერის ბაჩუკი ქარდავას განცხადებით, "ქვეყანაში ორი პოლიტიკური პოლუსის - ხელისუფლების და ხელისუფლების ანარეკლი ბიძინა ივანიშვილის ჩამოყალიბების მცდელობა მიმდინარეობს".
ამის შესახებ ქარდავამ დღეს ქუთაისში, სასტუმრო "ბაგრატში" გამართულ ედპ-ის რეგიონულ კონფერენციაზე სიტყვით გამოსვლისას განაცხადა.
"დღეს ქვეყანაში მიმდინარე პოლიტიკურ პროცესებში ხდება ის, რაც არაერთხელ მომხდარა, - მიმდინარეობს მცდელობა ორი პოლიტიკური პოლუსის ჩამოყალიბებისა. ერთი - ეს გახლავთ ხელისუფლება, მეორე კი - ხელისუფლების ანარეკლი ბიძინა ივანიშვილის ჯერ უსახელო მოძრაობა, რომელიც ჯერ ჩამოუყალიბებელია, მაგრამ არის მცდელობა მეორე პოლუსის შექმნის. ასეთი პროცესები ჩვენ მრავალგზის გვინახავს და არცერთხელ ამ ქვეყნის პოლიტიკური ცხოვრებისთვის სიკეთე არ მოუტანია. "ეროვნულ-დემოკრატიული პარტიის" პოზიცია გახლავთ ის, რომ მცდელობა ზომიერი, ჩამოყალიბებული, დასავლეთზე ორიენტირებული პოლიტიკური ძალების გვერდზე ჩაწევისა უშედეგოდ დასრულდება. ასეთ ვითარებაში მნიშვნელოვნად მიგვაჩნია ქვეყანაში მესამე პოლიტიკური ცენტრის, ე.წ. ზომიერი, ცენტრისტული და დასავლეთზე ორიენტირებული ძალების გააქტიურება, რომლებიც არც ხელისუფლებას და არც ივანიშვილს და მის გარშემო შეკრებილ ერთი დღისთვის შექმნილ პარტიებს პოლიტიკური ველის მონოპოლიზების საშუალებას არ მისცემენ. ეს ქვეყანაში ჯანსაღი პოლიტიკური პროცესების განვითარების საშუალება იქნება", - განაცხადა ქარდავამ.
