"რესპუბლიკური პარტიის" თავმჯდომარის დავით უსუფაშვილის განცხადებით, ესტონეთის პრეზიდენტმა თომას ილვესმა ოპოზიციასთან შეხვედრისას "ნათლად დააფიქსირა, რომ რაც უფრო გაიწევს საქართველო სინგაპურისკენ, ევროპას მით უფრო დაშორდება".
"ეს ეხება ბევრ რამეს, მათ შორის - ერთპარტიულ და მრავალპარტიულ სისტემებს. მრავალპარტიული სისტემა არა მხოლოდ თეორიულად ყველაზე მისაღები ფორმაა სახელმწიფო მოწყობისა, არამედ ის, რაც ესტონეთში რეალურად არსებობს. ესტონეთის პარლამენტში 4 პოლიტიკური პარტიაა, მაგრამ არცერთს არ აქვს მნიშვნელოვანი უმრავლესობა და კოალიციური მთავრობები იქმნება. პრეზიდენტმა გააკეთა სერიოზული აქცენტი იმაზეც, რომ პოსტსაბჭოთა სივრცეში საუკეთესო შედეგი საპარლამენტო მმართველობის მოდელმა მოიტანა" - განაცხადა უსუფაშვილმა და დასძინა, რომ "ასეთი მოდელები სწორედ ძლიერი პარლამენტის პირობებში იქმნება, ძლიერი პარლამენტი კი, თავის მხრივ, მხოლოდ მრავალპარტიული პარლამენტი შეიძლება, იყოს".
ცნობისთვის, ესტონეთის პრეზიდენტი თომას ილვესი დღეს ქართული ოპოზიციური პარტიების ლიდერებს, კერძოდ, "ახალი მემარჯვენეების" თავმჯდომარეს დავით გამყრელიძეს, "რესპუბლიკელების" ლიდერ დავით უსუფაშვილს, "ქრისტიან-დემოკრატების" ერთ-ერთ ლიდერს ლევან ვეფხვაძეს, “ეროვნული ფორუმის” ლიდერ კახა შარტავას, “თავისუფალი დემოკარტების” ლიდერ ირაკლი ალასანიას შეხვდა.
იხილეთ დედანი
