”ინტერპრესნიუსი”, 1.08.2011

ახალი საარჩევნო კოდექსის პროექტი პარლამენტში 20 სექტემბრისთვის იქნება ინიცირებული. ამის შესახებ ჟურნალისტებს დღეს პარლამენტში გამართული სარედაქციო ჯგუფის შეხვედრის დასრულების შემდეგ განუცხადეს.
როგორც იურიდიულ საკითხთა საპარლამენტო კომიტეტის თავმჯდომარე პავლე კუბლაშვილი და "ქრისტიან-დემოკრატი" გიორგი ახვლედიანი აცხადებენ, 20 აგვისტოსთვის საარჩევნო კოდექსში შესატანი ცვლილებები ვენეციის კომისიას გადაეგზავნება და მხოლოდ ამის შემდეგ მოხდება მისი ინიცირება პარლამენტში.
"მემარჯვენე" მამუკა კაციტაძე კი ამ ფაქტს უმნიშვნელოვანეს ფაქტორად აფასებს და აცხადებს, რომ ვენეციის კომისიას, როგორც წესი, უკვე მიღებული კანონები გადაეგზავნებოდა ხოლმე და საკმაოდ მნიშვნელოვანია, რომ საარჩევნო კოდექსში ცვლილებების პროექტი პარლამენტში მხოლოდ მას შემდეგ იქნება ინიცირებული, რაც ცნობილი იქნება ვენეციის კომისიის დასკვნა. რაც შეეხება საკონსტიტუციო ცვლილებას, პავლე კუბლაშვილის თქმით, საკონსტიტუციო ცვლილებას, რომლის მიხედვით დეპუტატების რაოდენობა 150-დან 190-მდე უნდა გაიზარდოს, ასევე სექტემბერში იქნება პარლამენტში ინიცირებული.

იხილეთ დედანი